Րոպեներ առաջ ավարտվեց Ֆրանսիայի Սենատում Հայոց Ցեղասպանության հերքումը քրեականացնող օրինագիծի քվեարկությունը: Մոտ 7,5 ժամ տևած քննարկումն ավարտվեց Ֆրանսիայի Սենատի կողմից Հայոց Ցեղասպանության հերքումը քրեականացնող օրինագծի ընդունմամբ: Ավելի վաղ, մեկ ամիս առաջ՝ դեկտեմբերի 22-ին, օրինագիծը ընդունել էր Ֆրանսիայի Ազգային Ժողովի ստորին պալատը: Իսկ ավելի ուշ, Ֆրանսիայի Սենատի իրավական հարցերով հանձնաժողովի առաջարկը` օրինագծի անընդունելի լինելու մասին, սենատորների կողմից չէր ընդունվել:

Նշենք, որ չորեքշաբթի օրը Սենատի իրավական հարցերով հանձնաժողովը անընդունելի էր համարել նման օրինագիծը և առաջարկով էր հանդես եկել չքննարկել ու քվերկության չդնել լիագումար նիստում Ցեղասպանությունների հերքումը քրեականացնող օրինագիծը: Հայոց ցեղասպանության ժխտումը քրեականացնող օրինագիծը, որը ժխտման համար նախատեսում է 1 տարվա ազատազրկում և 45 հազ. եվրոյի չափով տուգանք: Ֆրանսիայի Սենատում մի անգամ արդեն դրվել է այդօրինակ օրինագիծ, 2011 թվականի մայիսին, սակայն այն մերժվել էր: Այդ օրինագիծը միայն հայերի ցեղասպանության ժխտումը քրեականացնելու մասին էր, իսկ ներկայիս օրինագիծը վերաբերում է մարդկության դեմ գործած ոճիրներին: Ֆրանսիան պաշտոնապես այդպիսին է համարում հայերի եւ հրեաների ցեղասպանությունը: